Мазкур сув ҳисобини юритишни амалда жорий этиш мақсадида Хоразм вилоятининг Ҳазорасп тумани ҳудудидаги “Ғофур-Руҳия” фермер хўжалигида сув хўжалиги ташкилотлари раҳбар ва мутахассислари, фермер хўжаликлари раҳбарлари ҳамда Ирригация ва сув муаммолари илмий-тадқиқот институти (ИСМИТИ) ҳузуридаги Хоразм минтақавий маркази илмий ходимлари, тадқиқотчи-докторантлар иштирокида илмий-амалий семинар ўтказилди. 
Семинарда Хоразм минтақавий марказ директори, т.ф.н. О.Эшчанов, марказ илмий ходимлари И.Султонов ва Э.Собировлар томонидан сув танқислигини юмшатиш, ирригация тармоқларида бўлаётган сув исрофгарчиликларини камайтириш, сув ҳисобини юритиш ва уни рақамлаштириш бўйича маърузалар қилиниб, тегишли илмий асосланган таклиф ва тавсиялар берилди. 
Хусусан, ушбу фермер хўжалиги пахтачилик ва ғаллачилик йўналишида ташкил этилган бўлиб, жами ер майдони 179.2 гектарни ташкил этади. Фермер хўжалигининг ички хўжалик канали сув олиш жойида ИСМИТИ Хоразм минтақавий маркази олимлари томонидан тавсия этилган “Ўзгармас-ўзан” туридаги (сув ўтказиш кобилияти 1.5 м³/сек.) гидропост қурилиб ишга туширилган ва градуировка қилиниб, паспорт тайёрланган ҳолда туман “Сув етказиб бериш хизмати” давлат муассасасидан рўйхатдан ўтказилган. 
Шунингдек, марказ мутахассиси томонидан тайёрланган сув сатҳи ва сарфини ўлчовчи “Ақлли сув” электрон ускунаси ўрнатилиб рақамлаштирилган бўлиб, фермер хўжалиги томонидан олинган сув сарфи маълумотлари фермер хўжалиги ва туман “Сув етказиб бериш хизмати” давлат муассасасига онлайн режимда етказилмоқда.
Тадбирда фермер хўжаликлари фаол иштирок этишиб, келажакда сув ҳисобини юритиш ва уни рақамлаштириш бўйича аниқ режалар қилишни билдирдилар. Бундан ташқари, гидропостлар тури, қурилишга кетадиган сарф-ҳаражатлар, солиқ имтиёзлари юзасидан кўплаб саволларга жавоб олдилар.
Шу билан бирга, гидропост орқали сув ўтказиб, унинг сарфини рейка кўрсаткичи бўйича, шунингдек, онлайн режимда фермер хўжалигига келиб тушаётган маълумотлар солиштириб кўрсатилди ва ҳар иккала кўрсаткич бир хиллигига гувоҳ бўлишди. Бундан ташқари, илмий ходимлар томонидан тайёрланган гидропост қурилиши, сув сарфини юритиш ва уни рақамлаштириш билан боғлиқ буклетлар, гидропост паспортлари намуналари фермер хўжаликлари раҳбарларига қўшимча маълумот сифатида тақдим этилди.
Шу ўринда айтиш жоизки, ушбу марказ томонидан Шовот, Хонқа ва Тупроққалъа туманларида ҳам ўнлаб гидропостлар қурилиб рақамлаштирилган ва шу муносабат билан иштирокчилар билан ҳамкорликни давом эттиришга келишиб олинди.
Чапқирғоқ Амударё ИТҲБ матбуот хизмати
