Рўзимбой Қодиров “Шуҳрат” медали билан мукофотланди.
Бугун ҳавза бошқармасида Р.Қодиров билан учрашув ўтказилди. У кишига Сув хўжалиги вазирининг табриги етказилди.
“Давлатимиз раҳбарининг Фармонига биноан «Шуҳрат» медали билан тақдирланганингиз барчамизни қувонтирди.Сизни бу юксак мукофот ҳамда жонажон Ватанимиз мустақиллигининг 34 йиллиги билан кўп минг сонли сув хўжалиги ходимлари номидан самимий муборакбод этаман.
Сиз каби тажрибали ва жонкуяр ҳамкасбимиз борлигидан ҳамиша фахрланамиз.
Сув энг улуғ неъмат бўлиб, умрини, касбини шу соҳага бағишлаганлар эл-юртда ҳамиша эъзозланган, қадрланган.
Сувдек азиз бўлинг!”, дейилади Вазир табригида.
Рўзимбой ака 1963 йилда Боғот туманида таваллуд топган. У 1983 йили Урганч Гидромелиорация техникумини техник-механик мутахассислиги бўйича тугатиб, ўз меҳнат фаолиятини 1984 йилдан Боғот тумани Суғориш тармоқлари бирлашмасида гидроучастка кузатувчиси лавозимидан бошлаган. Бу меҳнатсевар инсоннинг янги ерларни ўзлаштиришда, янги каналларни қуриш ва бетонлашда, чекка-чекка ҳудудларга сув етказиб боришда амалга оширилган ишларга қўшган ҳиссаси беқиёсдир.- Бугун менинг камтарона меҳнатим алоҳида эътироф этилиб, шундай мукофотга лойиқ топилганимдан бошим кўкка етди. Юртимиз равнақи учун қўлимдан келгунча хизмат қилишда давом этаман, - дейди Рўзимбой ака.
Чапқирғоқ Амударё ИТҲБ матбуот хизмати
