Ўзбекистон Республикаси Президентининг “Хоразм вилоятини комплекс ижтимоий-иқтисодий ривожлантиришни жадаллаштириш бўйича қўшимча чора-тадбирлар тўғрисида”ги 2024 йил 29 ноябрдаги ПҚ-410-сон Қарори ижросини таъминлаш, шунингдек, коллекторлардан фойдаланиш тизимини тартибга солиш ва сув ресурсларидан оқилона фойдаланиш мақсадида Ўзбекистон Республикаси Вазирлар Маҳкамасининг 2026 йил 30 мартдаги “Озёрний” коллектори тизимини тиклаш ва сув ресурсларидан оқилона фойдаланиш ишлари” лойиҳасини амалга ошириш чора-тадбирлари тўғрисида”ги 121-сонли қарорига асосан мазкур коллекторнинг 1,2 км қисмида эски ўзанини тиклаш ва 24,07 км қисмида ўзанини иншоотлари билан реконструкция қилиш, коллектор сувларидан қайта фойдаланиш учун коллектор тизимида 6 та насос станцияларни қуриш ишлари белгиланган.
Жумладан, “Эски Озёрний” коллекторига бош сув олувчи иншоот қуриш, коллекторнинг 19,25 км қисмини реконструкция қилиш, 907 гектар экин ерларини суғориш учун сув чиқариш қуввати 1,5 м³/с бўлган 2 та ва 1,0 м³/с бўлган 1 та, Шовот туманида 2 440 га ерларини суғориш учун “Ғозовот-Давдон” коллектори ПК205+10 қисмида сув чиқариш қуввати 2,3 м³/с, “Давдон” коллектори ПК205+00 қисмида эса қуввати 0,7 м³/с бўлган насос станцияларини, шу билан бирга, бош сув олиш иншоотида диспетчерлик биносини ва иншоотгача 1,9 км инспекторлик йўлини қуриш ишлари режалаштирилган.
Мазкур лойиҳа доирасида 6 241 гектар суғориладиган ерларнинг сув таъминоти яхшиланади. Бу эса ўз навбатида фермер ва деҳқонларга қишлоқ хўжалиги маҳсулотларидан юқори даромад олиш имконини беради. Бундан ташқари 1 598 гектар майдондаги кўллар кафолатли сув билан таъминланиб, балиқ етиштириш ҳажми ортади.
Ҳозирда мазкур объектнинг ПК420+60 қисмида янгидан сув тўсувчи иншоот барпо қилиш ҳамда ПК230+10 қисмида реконструкция қилиш ишлари бажарилмоқда.

Чапқирғоқ Амударё ИТҲБ матбуот хизмати